... nach langer ziit...

sali zeme

han scho e eewigkeit nüüt meh da inegschribbe!
s het sich au scho recht vill taa underdesse:
de flüüger isch uf de name DIKRANOS tauft worde und het im letschte winter erfolgriich die erschte teschtflüüg absolviert!
Mini Maturarbet isch au scho längscht abgschlosse und au scho zwei mal uuszeichnet worde!
das projektli isch aber jetzt nöd öppe gstorbe! ich wirde wiiterhin draa schaffe und wirde versueche mitem im nöchschte jahr denn au a fluugtääg z gaa umen dete voorzfüere

Erschti Bilder nach wuchelanger Arbet

Eh Lüüt
Luegets eu mal aa. Ich find er isch glunge. Und ihr?
Jetzt bruucht er nur no en Name und mues no bewiise, das er au würkli flüügt.

die erschte Messige

Aso
Ich han mal die erste Messige gmacht und bin völlig unzfride demit.
Es het sich usegstellt, dass min Prototyp zwüsche 500 und 600g Schub gha het. I dem Projekt han ich mir vorgnoo jedoch e grösseri Version z baue. Es isch logisch, dass denn au meh schub benötigt wird. Won ich denn die zwei stärchere Motore gmesse han isch d Entüüschig gross gsii, wil ich nie meh als 500g Schub anebracht han. Ich wird nöchscht wuche nomal en Versuech starte, denn aber mit meh Spannig. Die ganze Teili won ich benütze sind jedoch scho zimli a ihrne Leischtigsgrenzene aaglangt. Darum vermuete ich, dass mit de grosse Spannig au zimlich vill meh Tuurezahl erreicht wird unds mer denn de Propeller verjäte wird. Das isch huere heikel und zudem au tüür, wirds jedoch trozdem mal versueche.
Falls ich jedoch nöd meh schuub ane bring wird ich eifach e neui version vo mim Prototyp baue. D.h. gliich gross, gliiche Motor, jedoch besser.

Motore Problem

mini ganz arbet isch i sit öppe zwei oder drüü wuche zum staa cho. s problem isch nemlich de motor. de kaufti motor isch leider wie sich im nachhinein usegstellt het vill z schwach und darum bin ich sit längerem uf de suechi nachemne neue. ich han mehreri motore duregrechnet und usegfunde, das imene flüüger vo mim brüeder en passende motor dine isch. de hani natürli grad uusboue und uf min prüefstand gsetz. ich han scho gmeint ich chöng jetzt voll loslege mit messige und so. nachdem ich jedoch gmerkt han, das de so unruhig lauft han ich en mal usenand gna und da sind mer plötzlich d magnete entgegecho. jetzt wart ich wider uf e neui glogge mit neue magnetli dinne und chann scho wider nüüt mache.
s grundlegende problem isch nemli, dass ich de flüüger ersch konstruiere chann, wenn ich weiss wie vill schub ich zur verfüegig han.
sobald ich also de grümpel wider zrugg bechume wird ich endlich mit dene messige aafange und die natürlich grad da poste.

Name fürs Projekt

het susch öppert no e idee für en sinnvolle name für mis Projekt
min prototyp (http://www.epower.ch/forum/viewtopic.php?t=524) hani canardmate tauft
das will die rückwärskonstruktion canard heisst (Ente) und die Bauart vomene ursprüngliche modell abstammt (Ulitmate)
jetzt bin ich uf de suechi nach emene neue name
vilicht irgend öppis mit hybrid oder susch irgend öppis.
het echt öppert no e konstruktivi idee?

Begrüessig

ciao zeme!
das isch min blog über min spezielle Flüüger
wird aber meischt nur bilder und videos ierüere, die aber nur wenig kommentiere
S bruucht susch eifach z vill Ziit!!!!
(und die isch ja bekanntlich sehr knapp)